Яңылыҡтар

Депутат ҡабул итә
19 апрелдә иртәнге сәғәт 10-дан төшкө 1-гә  тиклем муниципаль район хакимиәте бинаһында (301-се бүлмә)  Федераль Йыйылыш Дәүләт Думаһы депутаты Сәлиә Шәрифйән ҡыҙы Мырҙабаева граждандарҙы шәхси һорауҙары буйынса  ҡабул итә.
Шулай уҡ БР буйынса Йәш эшҡыуарҙар ассоциацияһы юрисы бушлай консультация бирәсәк.
Белешмәләр өсөн телефон: 3-10-07.
 

Яңы үҙәк эш башланы
Сибай ҡалаһында “Урал аръяғының эшлекле донъяһы” бизнес үҙәге базаһында республикабыҙҙың көньяҡ-көнсығыш төбәгенең бәләкәй һәм урта бизнес вәкилдәре өсөн беренсе мәғлүмәт-консультация үҙәге асылды.
Бында эшҡыуарҙар һалым түләү, бухгалтер иҫәбе, кредит юллау, предприятиены хоҡуҡи яҡлау һәм үҫтереү, бизнесты планлаштырыу, квалификацияны күтәреү һәм эшмәкәрлектең башҡа мәсьәләләре буйынса консультация ала аласаҡ.
Мәғлүмәт-консультация үҙәгенә һәр кесе йома 14.00 сәғәттән 16 сәғәткә тиклем мөрәжәғәт итергә була. Адресы: Сибай ҡалаһы, Индустриаль шоссе урамы, 32.
 

“Уңған килен, сабыр ҡәйнә – тормош нигеҙе”
Ошо исем аҫтында Мерәҫ китапханаһында бәйге үткәрелде. Унда ауылдың иң уңған килендәре һәм ҡәйнәләре көс һынашты. Программала визитка, аш-һыуҙы рекламалау, концерт номерҙары, ҡул эштәре күрһәтелде. Барлыҡ һынауҙарҙы уңышлы үткән Зәйтүнә Зиннур ҡыҙы һәм Розалия Миңлебай ҡыҙы Нәҙербаевалар еңеүсе тип табылды. Улар тиҙҙән зона ярышында ауыл намыҫын яҡлаясаҡ. Ойоштороусылар сараның бағыусыһы -Мерәҫ ауыл биләмәһенә ҙур рәхмәтен белдерә.                                                                          
Д. Яхина, китапханасы.
 

Келәмдә – көрәшселәр
Иртәгә ҡаланың “Баһадир” физкультура-һауыҡтырыу комплексында республика кимәлендә милли көрәш буйынса “ХХ Ауыл спорт уйындары” сиктәрендә ярыш башланасаҡ. Унда бығаса ҡатнашмаған Балтас, Нуриман, Күгәрсен һ.б. райондар спортсылары ла килеүе көтөлә. Ярыш 2 көн дауам итәсәк.
 

Эфирҙа — еңеү һалдаттары
Һуғыш йылдары алыҫлашҡан һайын уның хәтирәләре тоноҡлана бара. Ләкин илебеҙҙең күгенә тыныслыҡ алып килгән Еңеү һалдатын оноторға хаҡыбыҙ юҡ. Баймаҡ телерадиотапшырыуҙар студияһы Бөйөк Ватан һуғышы ветерандарына бағышланған өр-яңы рубрика тәҡдим итә. Унда ҡала һәм райондың һуғыш һәм тыл ҡаһармандары үҙ иҫтәлектәре менән уртаҡлашасаҡ. Ике телдә әҙерләнгән “Еңеү һалдаттары” программаһы кесаҙнанан эфирға сыға башлай.
В. Әбйәлилова, БДУСИ студенты.

Конкурстар

Темәс төбәге еңеүселәре
 

Имен бала саҡ һәм ғаилә ҡиммәттәрен нығытыу йылы айҡанлы районда “Йәш ғаилә-2012” район конкурсы иғлан ителде. Муниципаль район хакимиәтенең йәштәр эштәре буйынса секторы, ЗАГС бүлеге һәм ҡатын-ҡыҙҙар советы тарафынан ойошторолған сара 6 төбәктә үтәсәк һәм унда еңгәндәр 15 майҙа – Халыҡ-ара ғаилә көнөндә — район конкурсында үҙ көстәрен һынаясаҡ. Ғаилә байрамы ошо көндәрҙә Темәс ауылында башланды. Унда Ҡолсора ауыл биләмәһенән Ғафаровтар, Һиҙиәтуллиндар, Темәстән Йәмлихиндар, Билалдан Ғайсиндар һәм Түбәнән Ғәйетовтар ғаиләләре ярышты. Сәмле бәйгелә еңелеүселәр булманы, әммә Ҡолсоранан Зөлфирә һәм Артур Ғафаровтар иң шәп ғаилә тип табылды.
 

Айгөл Иҙелбаева.


Ҡурайсылар бәйгеһе үтте
 

10 апрелдә Ғата Сөләймәнов исемендәге сәнғәт мәктәбендә атаҡлы ҡурайсы, йырсы, актер, Башҡорт АССР-ының халыҡ артисы, РСФСР-ҙың атҡаҙанған мәҙәниәт хеҙмәткәре Ғата Сөләймәновтың тыуыуына 100 йыл тулыуға арналған төбәк-ара йәш ҡурайсылар бәйгеһе үтте. Унда Баймаҡ, Әбйәлил, Йылайыр, Белорет, Хәйбулла районы ҡурайсылары көс һынашты. «Урал», «Азамат», «Бөркөт», «Ҡаһым түрә», «Сыңрау торна», «Төйәләҫ» һ. б. көйҙәр яңғыраны. 10 ансамбль, 7 йәштән 11 йәшкә тиклем – 18,  12 йәштән 16 йәшкә тиклем 35 ҡурайсы ҡатнашты. Гран-приҙы Белорет егете Фидан Сибәғәтов яуланы.  Баймаҡ егеттәре лә  һынатманы: Ғ.Сөләймәнов исемендәге сәнғәт мәктәбе тәрбиәләнеүселәре Илнур һәм Азамат Әҙелғужиндар беренсе урын алды. Ансамблдәр араһында Ғ.Сөләймәнов исемендәге сәнғәт мәктәбе икенсе урынды яуланы.

Айгөл Абдрахманова. БДУСИ студенты.
(Конкурстарҙан тулыраҡ мәғлүмәтте киләһе һандарҙың береһендә уҡырһығыҙ).

Һалым түләүселәр иғтибарына

Семинар ойошторола
 

2012 йылдың 18 апрелендә федераль һалым хеҙмәтенең 37-се район-ара инспекцияһының Баймаҡ районы буйынса бүлексәһендә (адресы: Баймаҡ ҡалаһы, С.Юлаев проспекты, 9, 2-се ҡат, 215-се бүлмә) 37-се район-ара инспекция һалым түләүселәр менән НДФЛ буйынса һалым декларациялары тапшырыу һәм тултырыу, һалым вычеттары түләү тәртибенә ҡағылышлы темаларға арналған семинар уҙғара. Унда 2012 йылдың декларация кампанияһы тураһында тулы мәғлүмәт һәм физик берәмектәр килеменә һалымға декларация тултырыу буйынса практик тәҡдимдәр биреләсәк.
Семинар сәғәт 11-ҙә башлана.
 

Ғ. Баййегетова,
өлкән һалым инспекторы, РФ дәүләт граждан хеҙмәтенең
II класлы советнигы.

Һөт һауыу

(11 апрелгә ҡарата көндәлек һауым, килограмдарҙа)

Хужалыҡтар	2011	2012
Ленин ис.	7,9	10,9
“Байҡара”	8	8,2
“Баймаҡ”	3,3	6,4
“Рассвет”	6,2	6,4
“Мырҙаҡаев”	4,2	7,5
“Уңыш”	3,7	6
“Таналыҡ”	4,4	6
“Союз”	4,5	6
“Октябрь”	4,4	4,9
“Йылайыр”	3,2	4,5
Салауат ис.	2,8	3,8
“Аҡморон”	1,5	3,5
“Урал”	2,2	3,4
Район буй.	4,1	5,9

11 апрелгә ҡарата районда көндәлек тулайым һауым 228 центнер тәшкил итә, был иһә 2011 йылға ҡарата 39 центнерға күберәк. Һөттөң ҡуйылығы Ленин, Салауат исемендәге, “Байҡара” хужалыҡтарында, тауарлылығы “Рассвет”, “Союз”, Салауат, Ленин исемендәге, “Уңыш” АХК-ларында юғары кимәлдә.

Сәсеүгә әҙерһеңме?

Миҙгелгә әҙерлек яҡшы
 

“Баймаҡ” ғилми-производство берекмәһе яҙғы баҫыу эштәренә әҙерлекте яҡшы алып бара. Ҡуянтауҙарҙың техниканы, ауыл хужалығы машиналарын ремонтлауҙы тейешенсә ойоштороуы күптән түгел ошо хужалыҡта һәм “Таналыҡ” АХК-һында үткән район семинар-кәңәшмәһендә лә билдәләнде. 

Предприятие яңы миҙгелгә хәстәрлекте иртә башланы. Иң тәүҙә ремонт оҫтаханаһында кәрәкле шарттар тыуҙырылды: бина йылытылды, механизаторҙар өсөн тейешле эш шарттары булдырылды, ваҡытында запас частарға заказ бирелде. Баш инженер Х.Ә. Буранбаев етәкселегендә техниканы ремонтлау эштәре билдәләнгән графикка ярашлы алып барыла. Уның әйтеүенсә, ремонтсылар үҙҙәренә тапшырылған бурысты теүәл үтәй, ваҡытында техниканы әҙерлек һыҙығына баҫтырыу өсөн бар көсөн һала. Бында ремонт аҙағына яҡынлаша инде.

«Түңәрәк өҫтәл»

Кәңәшле эш тарҡалмаҫ,
йәки “Талҡаҫ” шифаханаһында уҡыуҙар үтте
 

“Талҡаҫ” шифаханаһында ауыл биләмәләре хакимиәттәренең эштәр идарасылары, шулай уҡ Бөрйән һәм Йылайыр райондарының ауыл биләмәләре башлыҡтары белемен камиллаштырыуы хаҡында хәбәр иткәйнек инде. Уҙған йомала улар өсөн “Түңәрәк өҫтәл” ойошторолдо. Был сарала муниципаль район хакимиәте башлығы И.Х. Ситдыҡов, район Советы секретары

 Р.З. Ишбулатов, Йылайыр районы хакимиәте башлығы И.Л. Фәтҡуллин, Йылайыр район Советы секретары Ю.П. Емельянов, Бөрйән районы хакимиәте башлығы урынбаҫары Д.С. Яхин ҡатнашты.
И.Х. Ситдыҡов:
– Ейәнсура районы үҙәге Иҫәнғолда үткән “Ҡулланыусылар кооперацияһының әҙерләү эшмәкәрлеген үҫтереү. Ауыл хужалығы ҡулланыусылар кооперацияһын ойоштороу” кәңәшмәһендә күтәрелгән мәсьәләләр бик мөһим. Ейәнсура районының ҡулланыусылар йәмғиәте ҡарамағында эшләп килгән әҙерләү эшмәкәрлеге бөгөн киң ҡолас алған. Предприятиела йыл әйләнәһенә даими рәүештә тире, ит, йөн, макулатура, һөт, ә йәй көндәре иһә дарыу үләндәре (мәтрүшкә, ҡомалаҡ, кесерткән һ.б.), ҡара ҡарағат, сейә, балан ҡабул итәләр. Ә инде халыҡтың пластик шешәләрҙе, пакеттарҙы тапшырып аҡса эшләүе һәр кемдә ҙур ҡыҙыҡһыныу уятты. Ошо тәңгәлдә һәр төбәктә лә эш башлау мотлаҡ. Сөнки беҙҙә пластик шешәләр аяҡ аҫтында тулып ята.

01 иҫкәртә

Кипкән үләндәрҙе яҡмағыҙ!

Рәсәй Ғәҙәттән тыш хәлдәр министрлығының Башҡортостан Республикаһы буйынса Баймаҡ ҡалаһы һәм районының янғын хәүефһеҙлеген күҙәтеү бүлеге көндәр йылытыу менән ихата алдарында, баҡса биләмәләрендә, асыҡ яландарҙа янғын сығыу хәүефе артыуы хаҡында иҫкәртә. Уларҙың төп сәбәбе – ут менән һаҡһыҙ эш итеү, бигерәк тә сүп-сар, кипкән үләндәрҙе яҡҡанда уттың таралыу ихтималлығы арта. Яҙ етеү менән янғын һүндереүселәр ҡый-һай яҡҡанда ҡарауһыҙ ҡалған усаҡтан сыҡҡан янғынды һүндереүгә йыш саҡырыу ала. Ут торлаҡ йортҡа, башҡа ихата ҡаралтыларына күскән осраҡтар ҙа булып тора. Һәр дүртенсе янғын былтырҙан ҡалған ҡоро үләнде яғыуҙан сыға. 

Дәүләт янғын хәүефһеҙлеген күҙәтеү бүлеге йорт алды, ихата ҡаралтылары эргәһендә усаҡ тоҡандырыу ҡәтғи тыйылыуы хаҡында иҫкәртә. Иҫегеҙҙә тотоғоҙ: утты ихата ҡаралтыларынан 50 метр алыҫлыҡта ғына тоҡандырырға рөхсәт ителә, ә баҡса ширҡәттәрендә уның өсөн махсус урын билдәләнергә тейеш. Дачаларҙы, баҡсаларҙы, бина һәм ҡоролмалар араһындағы юлдарҙы, биләмәләрҙе яғыулыҡ-майлау материалдарынан, сүп-сарҙан, төрлө һауыттарҙан, ҡойолған япраҡтарҙан, кипкән үләндәрҙән мотлаҡ таҙартып торорға кәрәк. Һәр йорт алдында һыу тултырылған мискә урынлаштырырға, янғын һүндергестәр тоторға кәңәш ителә.
2012 йылдың 1 апреленән республика биләмәһендә янғын хәүефһеҙлеге режимы индерелде. Шуға ярашлы, былтырғы кипкән үләндәрҙе яҡмағыҙ, тыйылған урындарҙа усаҡ тоҡандырмағыҙ. Уларҙың ҙур хәүеф менән янауын онотмағыҙ!

Р. Батталов,
Баймаҡ ҡалаһы һәм районы буйынса янғын хәүефһеҙлеген күҙәтеү бүлеге инспекторы.

Хәтер

Баймаҡҡаһарманы

Полковник Исхаҡ Ғүмәровтың тыуыуына – 100 йыл
10 апрелдә Ҡыҙыл Байраҡ һәм Б.Хмельницкий орденлы 5-се Удар армияның 301-се уҡсы дивизияһының 1050-се полкы командиры гвардия полковнигы, Бөйөк Ватан һуғышы ветераны данлыҡлы яҡташыбыҙ Исхаҡ Иҙрис улы Ғүмәровтың тыуыуына 100 йыл тулды.
И.Ғүмәров районыбыҙҙың Үрге Мәмбәт ауылында тыуған. Хеҙмәт юлын 12 йәшендә Баймаҡ алтын рудниктарында башлай. Баймаҡ тау сәнәғәте техникумында уҡый. 1933 йылдың 1 сентябрендә Ҡыҙыл Армия сафына алына, 1936 йылда Ҡазандағы татар-башҡорт хәрби училищеһын тамамлай һәм бар ғүмерен хәрби һөнәргә бағышлай.

Яҙыусы Самат Шәкир шулай тип яҙа: “Исхаҡ Ғүмәров Ҡазанда уҡығанда татар яҙыусылары: Ҡәүи Нәжми, Муса Йәлил, Мөхәмәт Әблиевтар менән аралашҡан, дуҫ булған. Спорт ярыштарында ҡатнашҡан, призлы урындар яулап, Мәскәүгә лә барған...” («Ҡазан утлары», №1, 1975 йыл, “Империя канцелярияһын штурмлау”).
Уҡыған йылдарҙа И.Ғүмәров Шишмә районы ҡыҙы Нәфиға Мирмөхәмәт ҡыҙына өйләнә. Хәрби училищены тамамлағас, Камчаткала рота командиры булып хеҙмәт итә. 1939 йылда иһә М.В. Фрунзе исемендәге Хәрби академияға уҡырға инә.
1941 йылдың майында ҡыҫҡа ваҡытлы отпуск ваҡытында И.И. Ғүмәров Баймаҡҡа ҡайтып, әсәһен, туғандарын күреп китә. Мәскәүгә үҙе менән бер туған һеңлеһе Гәүһәрҙе лә ала.

Спорт

Уҡытыусы рухы хөрмәтенә
 

Үткән шәмбе Баймаҡ лицей-интернаты үҙенә Урал аръяғы спортсыларын йыйҙы. Бында Рәсәй Федерацияһының мәғариф отличнигы Рафаэль Әхмәт улы Сырлыбаев иҫтәлегенә өҫтәл теннисы буйынса төбәк-ара беренселектең асыҡ турниры уҙғарылды.
Был ярыш быйыл ун өсөнсө мәртәбә үтте. Сара башында спортсыларға һәм көйәрмәндәргә лицей-интернат уҡыусыларының йырлы-моңло тамашаһы тәҡдим ителде. 

Район хакимиәтенең мәғариф бүлеге начальнигы Ринат Фазылйән улы Ильясов йыйылыусыларҙы ҡотлап, Рафаэль Әхмәт улына бәйле иҫтәлектәре менән уртаҡлашты. Артабан һүҙҙе лицейҙың тәрбиә эштәре буйынса директор урынбаҫары Ғ.Л. Юнысова алды.
– Бөгөн ярышта барлығы 123 кеше ҡатнаша, – тине Ғәлимә Лоҡман ҡыҙы. – Хәйбулла, Йылайыр, Сибай, Магнитогорск, Учалынан килгән спортсылар үҙҙәренең таҫыллығын күрһәтәсәк.
Район элемтә үҙәге начальнигы Айрат Марат улы Ҡадыров та был сараға килгәндәре өсөн барлыҡ спортсыларға, көйәрмәндәргә  үҙенең рәхмәтен белдерҙе, уңыштар теләне.
Әйткәндәй, ярыштың бағыусылары рәүешендә “Баймаҡ ПМК-һы” ЯСЙ-һы, “Инфоком” ЯСЙ-һы (Сибай), “ТехЭнерго” ЯСЙ-һы, “Орхидея” магазины, “АрсАвто” ЯСЙ-һы, И.Мостафин, А.Сырлыбаев ШП-лары сығыш яһаны. Турнир флагын 2011 йыл чемпионы Алексей Горюнов (Сибай) күтәрҙе.
Ярыш һөҙөмтәләре буйынса мәктәп уҡыусылары араһынан малайҙарҙан беренсе урынды Рәмис Лоҡманов (БЛИ), икенсе-өсөнсөнө Илнар Биктин (БЛИ), Илнур Дәүләтбирҙин (Беренсе Этҡол) алды. Ә ҡыҙҙар араһынан тәүге урындарға Луиза Йәналина (Буранбай), Илһөйәр Солтанғужина (Йылайыр), Нәйлә Сәхәүетдинова (Йылайыр) лайыҡ булды.
40 йәшкә тиклемге ир-егеттәр араһындағы ярышта беренселеккә Роман Кашапов (Сибай), Вәкил Таһиров (Йылайыр), Зөфәр Ҡәйепов (Аҡъяр) сыҡты. Был категорияла ярышҡан ҡатын-ҡыҙҙар араһынан иһә тәүгеләр рәтендә Айгөл Аҡманова (Аҡъяр), Емеш Яҡупова, Ләйсән Дәүләтшина (Сибай) булды.
40 йәштән өлкәнерәк ир-егеттәр араһында беренсе урынға Фәнүр Аралбаев (Буранбай), икенсегә Ильяс Ғарифуллин (Учалы) лайыҡ булһа, өсөнсөнө Владимир Войцеховский (Сибай) алды. Ә ҡатын-ҡыҙҙар араһынан Әлфиә Войцеховскаяға (Сибай) тиңләшеүсе табылманы.
Әйткәндәй, лицей-интернат уҡыусылары заманында Рафаэль Әхмәт улы күтәргән өҫтәл теннисы буйынса алдынғылыҡты бирмәй. Яңыраҡ Өфөлә Николай Рыжков кубогына үткән республика ярыштарында Илнар Биктин – беренсе, Рәмис Лоҡманов өсөнсө урын яуланы. 
Венера Әбйәлилова, БДУСИ студенты.
Айрат Марат улы Ҡадыров (Р.Ә. Сырлыбаевтың кейәүе):   
–    Нисәмә йылдар дауамында бындай матур сараны ойошторорға ярҙам иткән район хакимиәтенә, физик культура һәм спорт буйынса секторға, Баймаҡ лицей-интернатына рәхмәт белдергем килә. Бөгөн 123 кеше ҡатнашыуы үҙе был сараның ҙурая барыуын, яйлап республика кимәленә етеүен дәлилләй. Үҫеп килгән быуынды өҫтәл теннисына күберәк йәлеп итергә кәрәк. Сөнки был спорт төрө менән шөғөлләнеү осһоҙ ҙа, файҙалы ла.


Егеттәр финалға сыҡты
 

Аҙна аҙағы, ял көндәре булыуға ҡарамаҫтан, район һәм ҡалалағы спорт тормошо тынмай. Был юғары кимәлдә үткәрелгән төрлө сараларҙың даими ойошторолоуынан күренә.
6-8 апрелдә Баймаҡта “Көнсығыш” зонаның 1998-1999 йылғы уҡыусыларҙың баскетбол буйынса 3-сө спартакиаданың II этабы булды. Был ярыш 2013 йылда Өфөлә үтәсәк VI Ҡышҡы халыҡ-ара балалар уйындарына бағышланды. 

  174 спортсы ҡыҙ һәм егет 14 команда составында өс көн  дауамында 4-се мәктәптә һәм “Баһадир” физкультура-һауыҡтырыу комплексында көс һынашты. Һөҙөмтәлә, егеттәр араһынан өсөнсө урынды Учалы, икенсене Сибай яулаһа, беренсегә Баймаҡ командаһы (тренеры А.З. Байрамғолов) лайыҡ булды (һүрәттә).
Ҡыҙҙар ҙа бирешмәне. Баймаҡтар (тренерҙары Р.И. Мукаев, Е.В. Путенихина,) Учалы командаһынан ғына ҡалышып, пьедесталдың икенсе баҫҡысын биләне. Сибайҙар өсөнсө урынды яуланы.
Бынан тыш һәр команданың иң яҡшы уйынсыһы билдәләнде. Беҙҙекеләрҙән был маҡтаулы исем Максим Мазикин менән Нәйлә Ҡәйепҡоловаға бирелде.
Баймаҡ егеттәре командаһы тиҙҙән үтәсәк финал ярыштарында “Көнсығыш” зонаһын күрһәтәсәк.           
 

Айбулат Ишназаров. 

Автор фотоһы.


Шахмат һәм шашканан турнир
 

Уҙған йәкшәмбелә шахмат буйынса район кубогының икенсе этабы үтте. Беренсе урынды 7 мәрәйҙән алтыны йыйып И.Зөбәйеров алды. Икенсене 3-сө мәктәп уҡыусыһы Алмас Азаматов, өсөнсөнө – Х.Үтәев яуланы.
Кубок өсөн ярыш дүрт этапта уҙа. Был шартты үтәгән шахматсылар ғына юғары наградаға өмөт итә ала. Әлегә 9,5 мәрәй менән Х.Үтәев һәм А.Азаматов (9 мәрәй), Р.Үтәев (8 мәрәй) алда бара.

* * *
 

Шашка буйынса район кубогы быйыл тәүгә ойошторола. Ярыштың тәүге этабы 26 февралдә уҙһа, икенсеһе – билдәле журналист һәм шашкасы Ә.Х. Вәхитов иҫтәлегенә турнир – киләһе йәкшәмбелә Баймаҡтың шахмат клубында (4-се мәктәп) үтәсәк.
Әйтергә кәрәк, был ярыштарҙа өлкән шашкасылар – ир-егеттәр һәм ҡатын-ҡыҙҙар ҡатнаша. Балалар өсөн турнир айырым буласаҡ.

Спартакиада көндәлеге
 

Шәмбелә “Баһадир” физкультура-һауыҡтырыу комплексында спартакиада иҫәбенә үткән армспорт ярышында мәғариф учреждениелары араһында I урынды балалар һәм үҫмерҙәр спорт мәктәбе, икенсе һәм өсөнсөнө 4-се һәм 3-сө мәктәп яуланы. Хеҙмәт коллективтары араһынан “Рәсәй ауыл хужалығы банкы” ААЙ-һының Баймаҡтағы өҫтәмә офисы, “Баймаҡ ҡойоу-механика заводы” ААЙ-һы һәм эске эштәр бүлеге спортсылары алдынғы булды.