Яңылыҡтар

Уникаль операция

Баймаҡ үҙәк ҡала дауаханаһында Өфө табибы – врач-травматолог Йәүҙәт Мисбах улы Багашев янбаш-бот быуынын яһалмаға алмаштырыу буйынса уникаль операция яһаған. Медицина хеҙмәткәрҙәре, түшәктә ятҡан 79 йәшлек инәйҙең махсус дауаланыу курсын үткәс, аяҡҡа баҫасағына шикләнмәй. Бындай операция беҙҙең дауаханала тәүге тапҡыр эшләнгән.

Эш эҙләп

Халыҡты эш менән тәьмин итеү үҙәгендә “Йәштәргә – эш” республика акцияһы сиктәрендә вакансиялар йәрминкәһе үтте. Унда район һәм ҡала предприятие-ойошмалары ла ҡатнашты. Сараға  йөҙгә яҡын кеше йыйылды. Уларҙың 37-һенә эш тәҡдим ителде.

Гөрләп йәшәйҙәр

Беренсе Этҡол мәктәбе һәм БРКЛ уҡыусылары Шәфҡәтлелек айлығына ҙур теләк менән ҡушылған. Улар ололарға төрлө яҡтан ярҙам күрһәтә. Хеҙмәт ветераны Нәҡиә инәй Азаматова көҙгө уңышын йыйып биргән БРКЛ-дың 9-сы класс уҡыусыларына (М.Ю. Шәрипова етәкселегендә) бик тә рәхмәтле. Шулай уҡ Беренсе Этҡол биләмәһенә ҡараған ауылдарҙа экологик өмәләр дауам итә.

Әҙәбиәткә арнап

Мерәҫ китапханаһында башҡорт китаптары аҙналығы буйынса бик күп саралар үткәрелгән. Яҡташ яҙыусыларыбыҙҙың ижады буйынса әңгәмә, шағирә Зилә Ғәйетҡолова менән осрашыу, беренсе класс уҡыусылары өсөн “Һаумы, китапхана!”, кескәйҙәр өсөн “Башҡорт әкиәттәре” иртәлеге һәр кемдең күңеленә хуш килгән.
Г. Иҫәнгилдина.    

Балалар баҡсаһының нигеҙе әҙер!

Мәғлүм булыуынса, “Малыш” микрорайонында мөһим социаль объект – 220 урынға иҫәпләнгән балалар баҡсаһы төҙөлөшө ситтән килгән субподрядсыларҙың яуапһыҙлығы арҡаһында туҡтап ҡалғайны. Бына, ниһайәт, август башында район хакимиәтенең БР Хөкүмәтенә мөрәжәғәтенән һуң эштәр яңынан йәнләндерелде.

Киләһе уңышҡа нигеҙ һалына

Билдәле булыуынса, район хакимиәте башлығының һәм ауыл хужалығы бүлегенең тәҡдиме менән 15 сентябрҙән 15 октябргә тиклем районда ер эшкәртеү айлығы иғлан ителгәйне. Ауыл хужалығы бүлегенән алынған мәғлүмәттәргә ҡарағанда, кисәге көнгә район буйынса 5164 гектарҙа ер туңға һөрөлгән, 660 гектарҙа эшкәртелгән. План-задание 19360 гектар булып, ул ни бары 27 процентҡа үтәлгән.

Шәфҡәтлелек айлығы

Ололарға хөрмәт ҙур

Ленин исемендәге АХК, үҙ производствоһын юғары кимәлдә ойоштороуҙан тыш, Таулыҡай ауыл биләмәһенең социаль инфраструктураһын үҫтереүгә лә тос өлөш индерә. Халыҡ-ара ололар көнө лә бында һәр йыл байрамса уҙғарыла. 1 октябрь көнө ауыл мәктәптәрендә бөтәһе 287 ветеран хөрмәтенә аш табыны ойоштороласаҡ, концерт номерҙары күрһәтеләсәк. Йөрөй алмаған ололарға күстәнәс йыйылмаһы таратыласаҡ. Барлыҡ сығымдарҙы хужалыҡ күтәрә, ул етерлек ит, он, аҙыҡ-түлек алыу өсөн аҡса бүлгән дә инде.

Колледж ветерандарын онотмай

Өфө яғыулыҡ-энергетика колледжының Баймаҡ филиалы район буйынса иғлан ителгән Шәфҡәтлелек айлығына әүҙем ҡушылды. Һәр төркөмгә ветерандар бүленде һәм ололарға ярҙам ойошторолдо. Дәрестәрҙән һуң студенттар өлкәндәргә ярҙамға ашыға: кемдер утын яра, өй эштәрендә булыша, икенселәр кирбес ташый йәки картуф алыша. Беҙҙең өсөн был сара ололарҙы хөрмәт итеү, уларҙың күңеленә йылы өрөү булһа, ветерандар өсөн ҙур ҡыуаныс, йәш быуын менән аралашыу, уларҙың иғтибарын тойоу.
1 октябрь көнө беҙҙең колледж ысын байрам төҫөн аласаҡ, ветерандарға оло хөрмәт күрһәтеләсәк.  Әле был сараға ныҡлы әҙерлек эштәре бара.
Н. Бариева, әҙәби түңәрәк ағзаһы;
Г. Әминева, түңәрәк етәксеһе.

Рәсми бүлек

Рәсәйҙә Берҙәм тауыш биреү көнө индерелде

РФ Дәүләт Думаһы Рәсәйҙә Берҙәм тауыш биреү көнөн индереү тураһында закон ҡабул итте. Уға ярашлы, Берҙәм тауыш биреү көнө Рәсәйҙә йылына бер тапҡыр, сентябрҙең икенсе йәкшәмбеһендә үткәреләсәк. Был законды ғәмәлгә индереү өсөн 293 депутат ыңғай тауыш биргән.
Тимәк, алдағы һайлауҙар Рәсәйҙә 2012 йылдың октябрендә уҙа, ә унан һуңғылары сентябрь айында үткәреләсәк.
Закон проектын ҡабул итеү республика ҡануниәтенә үҙгәрештәр индереүгә сәбәп буласаҡ. БР Дәүләт Йыйылышы – Ҡоролтайҙың көҙгө сессияһында ҡараласаҡ төп закон проекттары араһында БР-ҙың Һайлау тураһындағы кодексына үҙгәрештәр индереү тураһындағы мәсьәлә лә бар.
Башинформ.

Район Советы ултырышы күсерелә

28 сентябрҙә беҙҙең районда Белорет, Межгорье, Сибай, Учалы ҡала округтарының, Әбйәлил, Баймаҡ, Белорет, Бөрйән, Ейәнсура, Йылайыр, Хәйбулла муниципаль райондарының административ комиссиялары ҡатнашлығында улар эшмәкәрлегенең көнүҙәк мәсьәләләре буйынса семинар-кәңәшмә үтәсәк. БР-ҙың Мировой судьялар эшмәкәрлеген ойоштороу һәм хоҡуҡи акттар регистрҙарын алып барыу буйынса идаралығы ойошторған был семинар эшендә хоҡуҡ һаҡлау органдары һәм дәүләт власы органдары вәкилдәре ҡатнаша.
Ошоноң менән бәйле, Баймаҡ районы муниципаль район Советы ултырышы 28 сентябрҙән 2 октябргә күсерелә. Ул халыҡ ижады үҙәгендә 15 сәғәттә башлана.
Муниципаль район Советы.

Пенсияны йәштән хәстәрлә

25 сентябрҙә Рәсәйҙең бөтә төбәктәрендә өлкән класс уҡыусылары, студенттар өсөн Берҙәм пенсия грамоталылығы көнө уҙҙы. Пенсия фонды идаралығы белгестәре, планға ярашлы, мәктәп, училище-лицей, юғары уҡыу йорттарына барып, пенсия системаһы, буласаҡ пенсияны формалаштырыу тураһындағы мәғлүмәттәр менән таныштырҙы.

Һорауҙарға башлыҡ яуап бирә

Уҙған йомала Баймаҡ ҡала биләмәһе башлығы Исмәғил Әхмәт улы Бураншин менән “Тура бәйләнеш” ойошторолдо. Ҡала халҡы ғына түгел, ауылдарҙан да шылтыратып үҙҙәрен борсоған һорауҙарын бирҙеләр. Иң мөһим һаналғандарын гәзит биттәренә тәҡдим итәбеҙ.

Ветеранға – ярҙамға

Бала саҡтан уҡ “Ололарҙы ололау – яҡшылыҡ билдәһе” икәнен белеп үҫтек. Шуға күрә беҙ, Баймаҡ лицей-интернатының 10-сы “а” класы уҡыусылары, “Шәфҡәтлелек айлығы” барғанда һис тә ситтә тороп ҡалмайбыҙ.
 

Мөғжизәле китап иле

23 сентябрь – китап көнө. Ошо уңайҙан, Баймаҡ ҡала китапханаһында башҡорт китабы аҙналығы үтте.
 

Уҡыусыларҙы страховкалау

Хәҙерге көндә республикала бөтәһе 400 меңдән ашыу уҡыусы иҫәпләнә. Уларҙың һәр унынсыһы бәхетһеҙ осраҡтарҙан Росгосстрах компанияһы тарафынан страховкаланған. Был күрһәткес бик түбән, әлбиттә. Ҡыҙғанысҡа ҡаршы, йылдан-йыл белем биреү учреждениеларында балалар травматизмы артһа ла, уҡыусыларҙы страховкалау популяр түгел. Был нимә менән бәйле һуң? Страховка мәҙәниәтенең түбән булыуымы? Әллә страховкалау мөмкинлектәренә ышанмаумы?
 

Ҡыҫҡаса

Баймаҡтар – беренсе!

21 сентябрҙә Шишмә районында Урман хужалығы ойошторолоуҙың 310 йыллығына арналған урман эшсәндәренең сираттағы ярышы үтте. Унда төбәк-ара конкурста еңеү яулаған 9 команда көс һынашты. Баймаҡ намыҫын “Баймаҡ урманы” ДУП-ынан Абрик Абдуллин менән Иштимер Зәйнәшев яҡланы. Конкурста ҡатнашыусылар теоретик һорауҙарға яуап биргәндән һуң, практик яҡтан һынау тотто. Һөҙөмтәлә, баймаҡтар беренсе урынды яуланы. Конкурстың шарттары буйынса, киләһе ярышты беренсе урын алған команда уҙғара. Шулай итеп, сират – баймаҡтарға.

Конкурс дауам итә

Йәштәр бүлеге тарафынан заманса башҡорт кейемдәре, милли кейем тегеүселәр араһында иғлан ителгән конкурс 1 октябргә тиклем дауам итәсәк. Конкурстың баһалама ағзалары үҙенсәлекле, зауыҡлы, сағыу эштәргә иғтибар бирәсәк.

Тимурсылар ярҙамға сыға

Уҙған аҙнала Сыңғыҙ мәктәбенең Х.Әхмәтов исемендәге пионер ойошмаһы эргәһендә эшләп килгән “Тимур командаһы” Шәфҡәтлелек айлығы сиктәрендә ауылдың оло йәштәге инәйҙәренә ярҙам күрһәтте. Улар картуф алышты, утындарын өйҙө, ихаталарын сүп-сарҙан таҙартты. Әйткәндәй, бындай сара айлыҡ барышында ғына түгел, йыл әйләнәһенә ойошторола.

Һунар асыла

Башҡортостан Республикаһы Хөкүмәтенең ҡарарына ярашлы, 24 сентябрҙән һыу, ялан ҡоштарына көҙгө-ҡышҡы миҙгел һунары асылды.
Л. Такаева.

Темәстә – йәрминкә

29 сентябрҙә “Темәс баҙары” МУП-ы биләмәһендә көҙгө йәрминкә үткәрелә. Сараға райондың ауыл хужалығы предприятиеларын, крәҫтиән-фермер хужалыҡтарын һәм шәхси хужалыҡ алып барыусыларҙы саҡырабыҙ. Сауҙа урындары бушлай. Рәхим итегеҙ!

Көҙгө байлыҡ мул булды

Баймаҡта көҙгө йәрминкәләр башланды

Йыл да, ялан-ҡырҙарҙа баҫыу эштәре тамамланғас, ҡалала көҙгө йәрминкәләр башлана. Аяуһыҙ ҡоролоҡҡа ҡарамаҫтан, быйыл район аграрийҙары мөмкин булғанса уңыш үҫтереп алды һәм үткән шәмбе баймаҡтарға үҙенең продукцияһын тәҡдим итте.
Әйтергә кәрәк, быйылғы йәрминкә лә ойошҡанлы үтте, ул үҙе бер ҙур байрамға әүерелде. Сараға килеүселәр үҙҙәренә кәрәкле тауар алып ҡына ҡалманы, ә күңелле ял итте, ҡаланың сауҙа предприятиелары етештергән тәмлекәстәрҙе лә ауыҙ итте.

Район Советы ултырышы була

2012 йылдың 28 сентябрендә сәғәт 10-да халыҡ ижады үҙәгендә Баймаҡ районы муниципаль район Советының сираттағы ултырышы була.

Көн тәртибендә:

1. Баймаҡ районы муниципаль районы биләмәһендә халыҡҡа сауҙа һәм көнкүреш хеҙмәте күрһәтеү торошо һәм уны яҡшыртыу буйынса саралар тураһында.
2. Баймаҡ районы муниципаль районы муниципаль милек Реестры иҫәбе һәм уны алып барыу тәртибе тураһында.
3. 2011-2012 йылдарҙа эпидемик миҙгелдә грипп һәм киҫкен респиратор вирус инфекцияларҙы профилактикалау буйынса саралар үткәреү тураһында.
4. 2012 йылға Баймаҡ районы муниципаль районы бюджетына үҙгәрештәр һәм өҫтәмәләр индереү тураһында һ.б.

Ултырышҡа Совет депутаттары, ауыл биләмәләре башлыҡтары һәм эштәр идарасылары, хужалыҡ, ойошма, учреждение, предприятие етәкселәре, сауҙа һәм халыҡҡа көнкүреш хеҙмәте күрһәтеү эшмәкәрлеге менән шөғөлләнеүсе эшҡыуарҙар, мәктәп директорҙары, фельдшер-акушер пункттары мөдирҙәре, имам-хатиптар, киң мәғлүмәт саралары вәкилдәре саҡырыла.

“Аҡъял”да – ат сабыштары

29 сентябрҙә Ҡуянтау ауылы эргәһендәге “Аҡъял” ипподромында төбәк-ара ат спорты ярыштары үтәсәк. Унда Өфө ҡалаһынан, Баймаҡ, Әбйәлил, Бөрйән, Йылайыр, Учалы райондарынан, Силәбе өлкәһенең төрлө төбәктәренән арғымаҡтар һәм юртаҡтар көс һынашасаҡ.
 

Ярыштар бер нисә заезда үткәрелә, башҡорт тоҡомло аттарҙың сабышына айырым иғтибар йүнәлтеләсәк. Ипподром биләмәһендә йәмәғәт туҡланыуы предприятиелары эшләйәсәк, концерт номерҙары күрһәтеләсәк.
 

Тамаша сәғәт 11-ҙә башлана. Бәйгелә әүҙем ҡатнашырға саҡырабыҙ. Байрамға рәхим итегеҙ!
 

Ойоштороу комитеты.

Һайлау – 2012

Участка һайлау комиссиялары рәйестәре составына үҙгәрештәр индереү тураһында
1054-се һайлау участкаһы
(үҙәге – мәктәп, тел. 4-47-91), Борисова Роза Садиҡ ҡыҙы, 1963 йылғы, Калинин ауылы мәктәбе уҡытыусыһы.
1069-сы һайлау участкаһы
(үҙәге – мәктәп, тел. 4-60-04), Кәйекбирҙин Миңлерәжәп Әғзәм улы, 1956 йылғы, Ишмөхәмәт ауылы мәктәбе директоры.
Ш. Моталлапов, территориаль һайлау комиссияһы рәйесе.

Автомобилһеҙ бер көн

Сәләмәт тормош алып барыу, йәш быуынды алама ғәҙәттәрҙән йолоп ҡалыу өсөн илебеҙҙә төрлө саралар күрелә, махсус программалар ҡабул ителә. 22 сентябрҙә Рәсәйҙә “Автомобилһеҙ бер көн” акцияһы иғлан ителде.

18 йәшкә тиклем пособие түләнә

2012 йылдың 17 сентябрендә Башҡортостан Республикаһы Хөкүмәтенең 2012 йылдың 6 сентябрендә донъя күргән “Башҡортостан Республикаһы Хөкүмәтенең ҡайһы бер ҡарарҙарына төҙәтмәләр индереү тураһында”ғы 309-сы ҡарары үҙ көсөнә инде.

Изгелекле ярҙамсыларыбыҙ

Баймаҡ лицей-интернатында быйыл өс йөҙҙән ашыу бала уҡый башланы. Ата-әсәләре уларҙы яңы уҡыу йылына бик яҡшы әҙерләгән. Шуға күрә Белем көнөндә беҙ матур, әҙәпле малайҙар һәм ҡыҙҙарға ҡарап бик тә шатландыҡ.

Янғаҙы фермеры – ауылдың тотҡаһы

Үҙенең данлы тарихы, матур йолалары, арҙаҡлы шәхестәре, һоҡланғыс кешеләре менән билдәле булған Янғаҙы ауылы, урындағы бүлексә тарҡалыуға ҡарамаҫтан, үҙ йүнен үҙе күреп йәшәй, шәхси эшҡыуарлыҡты, фермерлыҡ йүнәлешен үҫтерә. Крәҫтиән-фермер хужалығы етәксеһе Юлай Тимербулатов ошо ауылда ҡанат нығытҡан, уның социаль-иҡтисади тормошонда ҙур роль уйнаған арҙаҡлы егеттәрҙең береһе.

Һаран һүҙле, йомшаҡ күңелле атайҙар...

Ата тәрбиәһе, малайҙарҙы ысын ир-егет итеп тәрбиәләү... Һуңғы осор был мәсьәләгә бик ҙур иғтибар бирелә. Ошо көндәрҙә Өмөтбай мәктәбендә үткән сара ла бар кешелекте борсоған һорауҙарҙы үҙ эсенә алды. Мәғлүм булыуынса, районда барған башҡорт китаптары аҙналығында билдәле ижадсылар Рәмил Йәнбәк менән Әхмәр Үтәбай ҙа ҡатнашты. Өмөтбай мәктәбенә улар атай булараҡ та саҡырылды.

Исемдәрендә ил тарихы

Тормош ҡыҙыҡ ҡоролған. Кеше донъяға ауаз һалғас та ҙурлап, хөрмәтләп исем ҡушалар. Был бәләкәс кенә йән эйәһенә оло өмөттәр менән бағалар, матур киләсәк юрайҙар. Ул кеше, бәлки, алдағы тормошонда ҙур китап яҙыр әле...

Һүҙем С.Мифтахов премияһы, “Башҡортостан” гәзите лауреаты, хеҙмәт ветераны, матбуғат аҡһаҡалдарының береһе булған Салауат Хәбибрахман улы Мөхәмәтшин тураһында.

Камиллыҡтың юҡтыр сиктәре

Камил, һылыу зат, ул тәү нәүбәттә, ҡатын, әсә, хужабикә булараҡ өлгөргән, эштә уңышҡа өлгәшкән, хеҙмәттәштәренең ихтирамын яулаған, үҙ көсөнә ышанған һәм тормошто яратҡан шәхес булырға тейештер. Минең Гәүһәр апайымды ла бөтә яҡлап шундай заттар рәтенә индерергә мөмкин.

Ҡыҫҡаса

Шәфҡәтлелек акцияһы

Буранбай ауылында йәшәүсе хеҙмәт ветераны Кафыя Зөбәйер ҡыҙы Буранбаева ла үҙенең һөйөнөслө хәбәре менән уртаҡлашты. Ошо көндәрҙә тракторсы Хәйҙәр Раев, Рәйес Байрамғолов, Рамаҙан Үтәбаев, Сәлимгәрәй Усманов һәм 8-9-сы синыф уҡыусылары килеп, хеҙмәт ветеранының урамында ултырған иҫке өйҙөң нигеҙен һүтеп, йорт-ҡураһын тәртипкә килтергән.

Симфоник оркестр килә

27 сентябрҙә Башҡортостан Республикаһының милли симфоник оркестры киләсәк. Дирижер Рөстәм Сөләймәнов етәкселегендәге артистар “Доктор Айболит”, “Сказка о царе Салтане” һәм “Кино и музыка” әҫәрҙәре буйынса сығыш яһаясаҡ. Тамашалар 45 минут дауам итә.

Ғәҙелбайҙа экологик өмә

Ғәҙелбай ауылында сентябрҙең һәр шаршамбыһында экологик өмә үткәрелә. Ҡатын-ҡыҙҙар, йәштәр, уҡыусы балалар ауылдың тирә-яғын таҙартыуҙа әүҙем ҡатнаша. Ауыл биләмәһе башлығы Гөлнур Йыһанур ҡыҙы Азаматова һәм ауыл Советы депутаты Рәүеф Хәмитйән улы Ҡасҡынов ярҙамы менән зыяратты кәртәләү өсөн штакетниктар бүлеп бирелгән.
М. Ғәлина, клуб мөдире.

Мәктәп тормошо

Иҫке Сибай урта мәктәбендә лә тормош гөрләй. Бында яңыраҡ турслет булып үткән. Уҡыусылар үҙ-ара төрлө кимәлдәге ярыштарҙа ҡатнашҡан: малайҙар футболда көс һынашһа, ҡыҙҙар волейбол уйнаған. Бындай саранан һуң балалар ял итеп, яңы көнгә көс-дәрт алып таралышҡан. Шулай уҡ бында көҙгө йәрминкә булып үткән. Ҡыҙҙар һәм малайҙар үҙ баҡсаһында үҫкән йәшелсә-емештәрен, үҙҙәренең ҡул эштәрен һатыуға сығарған.

Бер мәсьәлә лә иғтибарһыҙ ҡалманы

Өсөнсө саҡырылыш муниципаль район Советына депутаттар һайлау көнө яҡынлашҡан һайын уға әҙерлек эштәре лә ҡыҙа бара. Мөһим сара алдынан бурыстарҙы билдәләү, башҡарылған эштәрҙе барлау, алдағы көндәргә эш планын аныҡлау маҡсатында 20 сентябрҙә халыҡ ижады үҙәгендә һайлауҙы ойоштороусылар һәм район активы ҡатнашлығында семинар-кәңәшмә үтте. Уны муниципаль район хакимиәте башлығы И.Х. Ситдыҡов алып барҙы.

Вакансиялар йәрминкәһенә рәхим итегеҙ!

2012 йылдың 26 сентябрендә иртәнге сәғәт 10-дан 12-гә тиклем Баймаҡ ҡалаһы, С.Юлаев проспекты, 40 адресы буйынса Баймаҡ районының халыҡты эш менән тәьмин итеү үҙәге “Йәштәргә – эш!” ХХХIII республика йәштәр акцияһы сиктәрендә вакансиялар йәрминкәһе ойоштора.
 

Йәрминкәлә ваҡытлыса һәм даими эш урындары тәҡдим ителәсәк, шулай уҡ психологик тест үтеү мөмкинлеге буласаҡ, “Резюмены дөрөҫ төҙөү”, “Эш эҙләү серҙәре”, “Әңгәмәләшеүгә барыусыға кәңәштәр” һ.б. темаларға белгестәр консультация бирәсәк.
Был сарала “Водоканал” ЯСЙ-һы, “Баймаҡ” ҡулланыусылар йәмғиәте, “Хисмәтуллин КФХ-һы” шәхси предприятиеһының “Башҡорт деликатестары”, “Яҡтылыҡ” кадрҙар агентлығы һ.б. ҡатнаша.
 

Һеҙ түбәндәге һөнәрҙәр буйынса үҙегеҙгә оҡшаған эш таба алаһығыҙ:

• авария-тергеҙеү эштәре слесары;
• автомобиль водителе;
• монтажсы;
• иретеп йәбештереүсе;
• икмәк бешереүсе;
• һатыусы;
• йөк тейәүсе;
• билмән яһаусы һ.б.

Эш биреүселәрҙе һәм эш эҙләүсе граждандарҙы йәрминкәлә ҡатнашырға саҡырабыҙ. Ойошмалар вәкилдәренең сарала ҡатнашыуҙары тураһында алдан хәбәр итеүҙәрен һорайбыҙ.
Белешмәләр өсөн телефон: 3-14-44, 2-22-50.

Дәррәү булды өмәләр

Көҙ миҙгеле килеп еткәс, ғәҙәттәгесә, бар халыҡ ҡышҡа әҙерлек алып бара. Кесе йомала районда һәр ерҙә экологик өмәләр уҙыуы ла быны дәлилләй.
Муниципаль район хакимиәтенең йәштәр эштәре буйынса секторы район Советы ҡарамағындағы йәштәр палатаһы менән берлектә районда һәм ҡалала ойошторған дөйөм өмәләрҙә уҡыусылар, студенттар, эшсе йәштәр ҡатнашты.
 

Юғары белемде – Баймаҡта

Ошо көндәрҙә муниципаль район хакимиәтендә Магнитогорск дәүләт университеты етәкселеге абитуриенттар менән осрашты. Гәзиттә хәбәр ителеүенсә, тап ошо уҡыу йортонда хәҙер Баймаҡтан сыҡмайынса ла белем алырға мөмкин. Рәсәйҙең иң абруйлы юғары уҡыу йорттарынан һаналған Магнитогорск дәүләт университетында уҡырға теләүселәр һаны йылдан-йыл арта бара, бында вуздың дистанцион белем биреү технологияларын уңышлы ҡулланылыуы ла ҙур роль уйнай.
 

Был университетта беҙҙең ҡаланан һәм райондан 56 кеше уҡырға теләк белдергән. Буласаҡ студенттарҙың күбеһе логопедия, документ һәм архив эштәре алып барыу, туризм һ.б. һөнәрҙәргә өҫтөнлөк биргән. Уҡыу Баймаҡта ойоштороласаҡ. Әйткәндәй, документтар ҡабул итеү дауам итә, ул 1 ноябргә тиклем барасаҡ. Белешмәләрҙе 3-14-14, 3-10-33 телефондары буйынса алырға мөмкин.

Викторина дауам итә

“Һаҡмар” гәзите редакцияһы территориаль һайлау комиссияһы менән берлектә 14 октябрҙә үтәсәк муниципаль кимәлдәге һайлауҙарға арнап гәзит уҡыусылар араһында викторина иғлан иткәйне.
Викторина шарттары буйынса дөрөҫ яуап биреүсе тәүге өс кеше еңеүсе тип һанала. Тәүге турҙа бөтә һорауҙарға ла бер генә кеше дөрөҫ яуап бирҙе. Шулай итеп, еңеүсе – Түбәнге Иҙристән Әлфирә Тажетдинова. Әйткәндәй, еңеүселәр викторина тамамланғас, редакцияға саҡырып бүләкләнәсәк.

Викторина яуаптары:
1. Баймаҡ районы муниципаль район Советына нисә депутат һайланасаҡ?
б) 19;
2. Һайлау көнөндә һайлау участкаһына килгән граждан ниндәй хоҡуҡ менән файҙалана?
в) актив һайлау хоҡуғы.
3. Баймаҡ районы муниципаль район Советы депутаты итеп нисә йәше тулған гражданин һайлана ала?
а) 18 йәше;
4. 14 октябрҙә үтәсәк һайлауҙа район буйынса бөтәһе нисә һайлау участкаһы эшләйәсәк?
б) 80;
5.  Һайлау бюллетенендә күрһәтелгән кандидаттың береһенә тауыш биргәндә уның фамилияһы тәңгәлендәге шаҡмаҡҡа ниндәй билдә ҡуйырға кәрәк?
в) теләһә ниндәй билдә.
6. Участка һайлау комиссияһы һайлау участкаһында тауыш биреү һөҙөмтәләре тураһында ҡарар ҡабул иткәндә ниндәй документ тултыра?
в) протокол.

Икенсе турға викторина һорауҙары:
1. Һайлау бюллетенендә теркәлгән кандидаттарҙың фамилиялары нисек күрһәтелә?

а) алфавит тәртибендә;
б) ирекле;
в) кандидаттарҙы күрһәтеү датаһы һәм ваҡыты буйынса;
г) кандидаттарҙы теркәү датаһы һәм ваҡыты буйынса.

2. Закон буйынса һайлау комиссияларының хәл иткес тауышҡа эйә булған ағзаларын күрһәтә ала:

а) уҡыусылар йыйылышы;
б) коллектив йыйылыш;
в) һайлаусылар йыйылышы;
г) бер тирәлә йәшәүселәр йыйылышы.

3. Халыҡтың власын күрһәтеүсе иң юғары ысул:

а) референдум һәм ирекле һайлауҙар;
б) митингылар һәм йыйылыштар;
в) референдум, ирекле һайлауҙар, митингылар һәм йыйылыштар;
г) тауыш биреү

4. Һәр һайлау участкаһы биләмәһендә күпме һайлаусы теркәлергә тейеш?

а) 4000 һайлаусынан күп түгел;
б) 3500 һайлаусынан күп түгел;
в) 3000 һайлаусынан күп түгел;
г) 2000 һайлаусынан күп түгел.

5. Территориаль һайлау комиссияһының вәкәләте нисә йыл?

а) 3 йыл;
б) 4 йыл;
в) 5 йыл;
г) 6 йыл.

6. 14 октябрҙә муниципаль район биләмәһендә һайлау ваҡыты:

а) иртәнге сәғәт 8-ҙән киске 8-гә тиклем;
б) иртәнге сәғәт 8-ҙән киске 10-ға тиклем;
в) иртәнге сәғәт 9-ҙан киске 10-ға тиклем;
г) иртәнге сәғәт 8-ҙән киске 11-гә тиклем.

Яуаптарығыҙҙы 26 сентябргә тиклем гәзитебеҙҙең электрон адресына (sakmar07@rambler.ru) ебәрә йәки 3-13-24 телефонына шылтыратып әйтә алаһығыҙ.

Ҡабул итеү графигы үҙгәрҙе

Башҡортостан Республикаһы буйынса Росреестр идаралығының Баймаҡ районы, Баймаҡ ҡалаһы һәм Сибай ҡалаһы буйынса бүлектәренең һәм күсемһеҙ милеккә, уның менән алыш-бирешкә хоҡуҡтарҙы дәүләт теркәүе өсөн документтар ҡабул итеү һәм биреү, күсемһеҙ милеккә хоҡуҡтарҙың Берҙәм дәүләт реестрынан мәғлүмәт биреү (Баймаҡ ҡалаһы, С.Юлаев проспекты,9, 203-сө, 302-се, 312-се, 313-сө бүлмәләр) һәм дәүләт кадастр иҫәбе (Баймаҡ ҡалаһы, С.Юлаев проспекты, 9, 313-сө бүлмә) буйынса Росреестрҙың Федераль кадастр палатаһының Баймаҡ районы һәм Баймаҡ ҡалаһы буйынса территориаль бүлегенең эш графигы үҙгәрҙе.

Дүшәмбе: 09.00 – 18.00
Шишәмбе: 08.00 – 20.00
Шаршамбы: 09.00 – 18.00
Кесаҙна: 09.00 – 20.00
Йома: 09.00 – 16.00
Шәмбе: 09.00 – 13.00
Ял көнө: йәкшәмбе.

Халыҡтың иғтибарын эш режимының үҙгәреүсән икәнлегенә йүнәлтке килә. Һәр кабинеттың конкрет эш ваҡыты ишектәрендә һәм мәғлүмәт стендтарында күрһәтелгән.
Күсемһеҙ милек һәм уның менән алыш-биреш итеүгә хоҡуҡтарҙы дәүләт теркәүенә документтар тапшырыу өсөн алдан яҙылырға мөмкин:
1. Росреестр тарафынан күрһәтелгән дәүләт хеҙмәтенең Интернет-порталына алдан яҙылыу сервисын ҡулланыу: https://portal.rosreestr.ru:

Дүшәмбе: яҙыу алып барылмай
Шишәмбе, кесаҙна: 14.00 – 18.00
Шаршамбы: 09.00 – 13.00
Йома: 14.00 – 16.00
Шәмбе: яҙыу алып барылмай
Ял көнө: йәкшәмбе.

2. Шәхси мөрәжәғәт итеү:
Баймаҡ ҡалаһы, С.Юлаев проспекты, 9, 302-се бүлмә.
3. Телефон аша: 8 (34751) 2-26-79 түбәндәге график буйынса:

Дүшәмбе: яҙыу алып барылмай
Шишәмбе, кесаҙна: 09.00 – 13.00
Шаршамбы: 14.00 – 17.00
Йома: 09.00 – 13.00
Шәмбе: яҙыу алып барылмай
Ял көнө: йәкшәмбе.

4. Росреестрҙың телефон хеҙмәтләндереүе ведомство үҙәгенең берҙәм номеры буйынса – 8-800-100-34-34 (Рәсәй төбәктәренән шылтыратыу бушлай).

Юлдар төҙөкләндерелә

Юл – тормошобоҙ көҙгөһө, тиҙәр. Уларҙың төҙөклөгө төбәктең социаль торошон  билдәләй. Был йәһәттән Баймаҡ юл ремонтлау-төҙөү идаралығы ҙур эштәр башҡара. Хеҙмәт коллективы Баймаҡта ғына түгел, күрше райондарҙа ла юлдарҙы төҙөкләндерә.

Заһит Ғүмәров – иң шәп шиғыр һөйләүсе

Күренекле шағир, Башҡортостандың атҡаҙанған мәҙәниәт хеҙмәткәре, З.Биишева һәм Ш.Хоҙайбирҙин исемендәге премиялар лауреаты Рәмил Йәнбәк ошо көндәрҙә үҙенең 60 йәшлек юбилейын билдәләне. Ошо уңайҙан Баймаҡ район китапханаһы уны һәм яҡташыбыҙ, билдәле журналист, яҙыусы, “Киске Өфө” гәзите мөхәррире урынбаҫары Әхмәр Үтәбайҙы башҡорт китаптары аҙналығына саҡырҙы. Шуныһы әһәмиәтле, районыбыҙҙың төрлө ауылдарында үткәрелгән осрашыуҙар мәлендә өлкәндәр генә түгел, уҡыусылар ҙа Р.Йәнбәктең ижады менән яҡшы таныш булыуы менән һоҡландырҙы.

Әҙерлек мәсьәләләре ҡаралды

Дүшәмбелә муниципаль район хакимиәтенең ултырыштар залында муниципаль район Советына депутатлыҡҡа дәғүә итеүсе теркәлгән кандидаттар ҡатнашлығында кәңәшмә үтте. Уның эшендә муниципаль район хакимиәте башлығы И.Х. Ситдыҡов ҡатнашты.
 

Яңы нигеҙҙең бәхетен күрегеҙ!

Бөйөк Ватан һуғышы яугирҙары, уларҙың тол ҡатындарын, инвалидтарҙы хәстәрләү өсөн илебеҙҙә махсус программалар эшләп килә. Шуларҙың иң һөйөнөслөһө – торлаҡ алыуға сертификат тапшырыу. 17 сентябрҙә районыбыҙҙа йәшәгән 8 кеше шундай ҡыуаныс кисерҙе. Улар араһында Чернобыль фажиғәһе эҙемтәләрен бөтөрөү өсөн эшкә ебәрелгәндәр ҙә бар ине. 
Район хакимиәте башлығы урынбаҫары И.М. Йәндәүләтов: “Башҡортостан Республикаһының 2011 йылдың 15 сентябрендә ҡабул иткән Ҡарарына ярашлы, районыбыҙҙа Бөйөк Ватан һуғышында ҡатнашҡан 69 яугир, 354 тол ҡатын, 18 инвалид торлаҡ шарттарын яҡшыртыу өсөн сертификат алды. Киләһе көндәрҙә лә шундай шатлыҡлы ваҡиғалар көтөлә. Бөгөн бәхетле минуттар кисергән кешеләрҙең барыһына ла яңы йорттарында шатлыҡ-ҡыуанысҡа төрөнөп йәшәргә яҙһын”, – тине. 
 

Ғаилә һөтсөлөк фермалары программаһы тормошҡа ашырыла

Билдәле булыуынса, былтыр республикала “2011-2013 йылдарҙа Башҡортостан Республикаһында крәҫтиән-фермер хужалыҡтары базаһында ғаилә һөтсөлөк фермаларын үҫтереү” программаһы ҡабул ителгәйне. Яңы проектты тормошҡа ашырыу өсөн беҙҙең районда ла маҡсатлы эш алып барылды һәм унда 10 фермер ҡатнашырға теләк белдергәйне.

95 йәшең менән, Хәжәр инәй !

Оҙаҡ йылдар ғүмер иткән, тормошон хеҙмәт менән биҙәгән инәй-олатайҙар һәр кемгә үрнәк булырлыҡ. 17 сентябрҙә 95 йәшен билдәләгән Хәжәр Мәһәҙи ҡыҙы Һөйөндөкованы ла ошондай бәхетле кешеләр рәтенә индерергә була. Хәҙерге көндә ул ҡыҙы Нәзифә Һөйөндөкова менән Ниғәмәт ауылында гөрләтеп донъя көтә. Ҡышҡы сатнама һыуыҡтар килеү менән Баймаҡ ҡалаһынан сертификат буйынса алған фатирҙарына күсенәләр. Йәй – ауылда, ҡыш ҡалала матур, татыу йәшәйҙәр, ейән-ейәнсәрҙәр, бүлә-бүләсәрҙәр тәрбиәләйҙәр.
 

Ғәҙәттән тыш хәлдәрҙә юғалып ҡалмағыҙ

Баймаҡ районы хакимиәте башлығының 2012 йылдың 4 сентябренән 4 октябренә тиклем район биләмәһендә Рәсәй оборонаһының 80 йыллығына арналған граждандар оборонаһы айлығын үткәреү тураһындағы ҡарарына ярашлы, халыҡты һаҡлау эффектлылығын күтәреү һәм район биләмәһен тәбиғәт һәм техноген характерҙағы ғәҙәттән тыш хәлдәрҙән һаҡлау йәһәтенән комплекслы саралар үтәсәк:

Һалым түләр мәл етте

Башҡортостан Республикаһы буйынса 37-се федераль һалым хеҙмәтенең район-ара инспекцияһы физик берәмектәргә 2011 йылға 2012 йылдың 1 ноябренән дә ҡалмай милеккә, ер һәм транспортҡа һалым түләү ваҡыты етеүе һәм милек һалымы түләүгә һалым уведомлениеһы ебәреү башланыуы тураһында хәбәр итә. Атап үткән һалымды ваҡытында түләмәүселәргә түләү талабы ҡағыҙы (түләргә тейешле суммаға пеня ҡушыла) ебәрелә.

Егәрленең эше уң

Август айында ҡалабыҙ уртаһында, йәғни һалым инспекцияһы урынлашҡан бина янында, 1-се ветеринар аптека асылғайны. Күп ҡатлы йорттоң тәүге ҡатында урынлашҡан аптека эргә-тирәһенең төҙөк булыуы һәм мөмкинлектәре сикләнгән кешеләр өсөн бөтә талаптарға ярашлы махсус пандус ҡуйылыуы менән үҙенә иғтибарҙы йәлеп итә.

Яңы еңеүҙәр юлдаш булһын!

Спорт... Уның тән өсөн файҙалы, һаулыҡты нығытыуын һәр кем белә. Шулай уҡ донъя кимәлендәге ярыштарҙы, олимпиадаларҙы ҡарап, һәр кем: “Быларҙы кем өйрәткән!” – тип һоҡланғаны йәки, киреһенсә, бик тә көйәләнгәне булғандыр. Яҡшы спортсыны тәрбиәләү бала саҡтан башлана. Бының өсөн ҙур ҡалала йәшәү ҙә мөһим түгел. Баланың теләге һәм, әлбиттә, яҡшы тренер кәрәк.

Халҡыбыҙҙың тарихын һаҡлап

Районыбыҙҙа Рәсәй тарихы йылына арналған матур, күркәм саралар күп үтә. Шуларҙың иң үҙенсәлеклеһе “Хәтерләйбеҙ, баш эйәбеҙ” тип аталған эстафета. Уны район китапханаһы “Атайсал” һәм ағинәйҙәр клубы менән берлектә ойошторҙо. Ауылының тарихына битараф булмаған инәй-олатайҙар заманында ишеткән, яҙып алған мәғлүмәтте махсус альбомға теркәй, артабан уларҙы эстафета ваҡытында икенсе ауылға тапшыра. Сараның төп маҡсаты –1812 йылғы һуғышта ҡатнашҡан яугирҙарыбыҙҙың исемдәрен билдәләү, быуындарға ҡайтарыу. Шуныһы әһәмиәтле, эстафета ваҡытында ҡаһарман яугирҙарҙың яңы исемдәре билдәләнде. Ә 1812 йылғы Ватан һуғышында ҡатнашҡан баймаҡтар бихисап булған. Шуға күрә ауылдан-ауылға эстафета тапшырған олатай-инәйҙәр тағы бик күп мәғлүмәт туплаясағына шик юҡ.

Ике йөҙ йыл элек булған ваҡиғалар, унда ҡатнашҡан батыр башҡорттарҙың тормошо һәр кемде ҡыҙыҡһындыра. Ошондай эшкә беҙҙең йәштәрҙең, мәктәп уҡыусыларының да йәлеп ителеүе ҡыуаныслы.

Яңы китап тураһында

Башҡортостандың Почетлы крайҙы өйрәнеүсеһе Әмир Зәкир улы Сәйғәфәровтың “Илһөйәр, ғәййәр олатайҙарыбыҙ” исемле китабы донья күрҙе. Был үҙенсәлекле китап киң ҡатлам китап уҡыусыларына, уҡытыусыларға, тыуған яҡты өйрәнеүселәргә тәғәйенләнгән.

Мөләйем дә, алсаҡ та...

”Яҡшы уҡытыусы өсөн уҡыусы – ул шәхес. Уны үҙеңдең балаң кеүек ҡабул итеп, күңелен яулау һәм һәләттәрен асыу – уҡытыусы алдына ҡуйылған  төп бурыстарҙың береһе. Ә бына уҡыусыны алған билдәләренә генә ҡарап баһалау мөмкин булмаған эш,” – ти, үҙ тормош принциптары тураһында бүлешеп, Баймаҡ лицей-интернатында 34 йыл химия фәнен уҡытҡан Гөлсара Искәндәр ҡыҙы Йәнтүрина.

Ҡыҫҡаса

«Һаҡмар» менән бергә ҡалығыҙ !

2013 йылдың 1-се ярты йыллығына матбуғатҡа яҙылыу башланды. Хөрмәтле дуҫтар, район-ҡала тормошо, яңылыҡтар менән ваҡытында танышып барырға, йөкмәткеле репортаждар, матур саралар, фәһемле мәҡәләләр уҡырға теләһәгеҙ, почта бүлексәһендә йәки почтальондар аша «Һаҡмар» гәзитенә оҙаҡҡа һуҙмай ғына яҙылып ҡуйығыҙ. Гәзитебеҙҙең тоғро дуҫтары киләһе йылда ла унан айырылмаҫ, тип ышанабыҙ.
Гәзиткә ярты йылға яҙылыу хаҡы – 352 һум 74 тин. Индексы – 50772.

Яңы китаптың исем туйы

20 сентябрҙә үҙәк район китапханаһында китап аҙналығы сиктәрендә Ҡолсора ауылынан билдәле йәмәғәтсе, матбуғаттың яҡын дуҫы Салауат Хәбибрахман улы Мөхәмәтшиндың “Данлы, ырыҫлы төйәгем” китабының исем туйы үткәрелә. Сараға урындарҙағы “Атайсал” һәм “Ағинәйҙәр” клубы рәйестәре, тыуған яҡты өйрәнеүселәр һәм китап һөйөүселәр саҡырыла. Сәғәт 11-ҙә башлана.

Экологик өмә

20 сентябрҙә сәғәт 9-ҙан Талҡаҫ һәм Граф күлдәре буйында экологик өмә үткәрелә. Унда студенттар һәм эшсе-йәштәр ҡатнашасаҡ.

“Автомобилһеҙ бер көн”

22 сентябрҙә муниципаль район хакимиәтенең йәштәр эштәре буйынса сектор тарафынан ”Автомобилһеҙ бер көн” акцияһы ойоштороласаҡ. Иртәнге сәғәт 12-лә ҡаланың 3-сө мәктәбе эргәһендә велосипедистарға старт биреләсәк.

Ауылдың сайты булдырылды

Хәтирәләрҙе йыйыу, һаҡлау һәм уны киләһе быуындарға тапшырыу маҡсатында, заманса ҡалыпҡа яраҡлаштырып, Интернет биттәрендә ауылыбыҙ Үрге Яйыҡбайҙың үҙ сайтын булдырҙыҡ. Сайтҡа ауылдың, урындағы хужалыҡтың тарихтары, топонимик мәғлүмәттәр, фотолар һ.б. индерелде. Материалдар крайҙы өйрәнеүселәрҙән, күренекле шәхестәрҙең яҙмаларынан алынды. Сайт әле тулыланыу, яңырыу кисерә. Уның адресы:  http://verkhneyaikbaevo.jimdo.com.
Беҙҙең сайтҡа рәхим итегеҙ!
И. Сафиуллин, Үрге Яйыҡбай ауылы.

“Матурлыҡ донъяны ҡотҡарыр”

Яңыраҡ ошо исем аҫтында Байышта үҙенсәлекле сара үткәрелде. Унда бар ауыл халҡы ҡатнашты. “Иң күп сәскә үҫтереүсе” номинацияһында Гран-приға Зәкиә Әширбаева лайыҡ булды. Уңған хужабикәнең “ботаник баҡса”һында 50 төр сәскә үҫеүен жюри юғары баһаланы.
Шулай уҡ байрамда иң ҡыҙыҡлы һәм иң ҙур йәшелсә конкурсы ла уҙғарылды. Тамашасыларға йәш ҡыҙҙар араһында үткәрелгән прическалар ярышы ла оҡшаны. Сәскә байрамы матур концерт менән тамамланды.
Н. Сөләймәнова, китапханасы.

“Малды һаҡлап ҡаласаҡбыҙ”

Хужалыҡтың алдынғы һауынсыһы
Гөлдәр Килдейәрова.

Район хужалыҡтарында иң яуаплы миҙгелдәрҙең береһе – мал ҡышлатыу кампанияһына әҙерлек эштәре дауам итә. Йыл ҡуйған ҡаты һынауҙарға ҡарамаҫтан, аграрийҙар мөмкин тиклем күберәк мал аҙығы туплап ҡалырға тырыша, ҡайһы бер предприятиеларҙа әле булһа уны һалыу дауам итә. “Таналыҡ” АХК-һында ла тармаҡты ҡышҡа хәстәрләү эштәре менән мәшғүлдәр.

Төҙөкләндереү дауам итә

Баймаҡ ҡала биләмәһе башлығы ҡарары менән 25 сентябрҙән 10 октябргә тиклем ҡаланы төҙөкләндереү һәм йәшелләндереү көндәре иғлан ителә. Шуға бәйле ҡалалағы учреждение, ойошма, предприятие биләмәләрен тәртипкә килтереү буйынса өмәләр ойоштороласаҡ. Был мөһим сараға күп ҡатлы һәм шәхси йорттарҙа йәшәүселәр ҙә ҡушыласаҡ.
 

Ҡотлайбыҙ!

Башҡортостан Республикаһының Йәш журналистар клубы эшмәкәрлегендә әүҙем ҡатнашҡаны өсөн “Һаҡмар” гәзитенең ауыл хужалығы бүлеге хәбәрсеһе Айбулат Салауат улы Ишназаров Башҡортостан Республикаһы Журналистар Союзының Маҡтау грамотаһына һәм ҡиммәтле бүләккә лайыҡ булды. Коллегабыҙҙы был еңеүе менән ихлас ҡотлайбыҙ, артабан да ижади уңыштар теләйбеҙ.

“Һаҡмар” гәзите коллективы.

“Маҡсатыбыҙ – патриотик тәрбиә биреү...”

Илдә тыныслыҡ булған саҡта уйламаған, күҙ алдына ла килтерә алмаған һуғышҡа барып инеү 18 йәшлек егеттәр өсөн яҙмыштың рәхимһеҙ һынауы булғандыр. Тән яралары алып, күңеле мәңгегә ҡаҡшап ҡайтҡан һалдаттар тураһында уйлаһаң – күңел әрней. Ә тормошо әле башланған мәлдә генә һәләк булыусылар уңалмаҫ йөрәк яраһы булып ҡалды. Шуға күрә хәрби хәрәкәттәрҙә ҡатнашҡан яугирҙарҙың йыйылышы ла тыныс ваҡытта һәләк булған иптәштәрен бер минут тынлыҡ менән иҫкә алыуҙан башланды.
4-се мәктәптә үткән сараға Афғанстан, Төньяҡ Кавказ һ.б. локаль һуғышта ҡатнашҡан ир-егеттәр йыйылды. Уларҙы мәктәп уҡыусылары тәбрикләп, йыр-моң, күңелле бейеү бүләк итте.

Баймаҡ ауыл хужалығы техникумы: кисә һәм бөгөн

Уҡыу йорто үҙенең 50 йыллығын билдәләйәсәк

Техникумдың педколлективы.

...1987 йыл. Беҙ, мәктәпте тамамлаған бер төркөм йәштәр, 1 сентябргә Яковлевка ауылындағы данлыҡлы “Йылайыр” совхоз-техникумына Белем көнөнә йыйылғанбыҙ. Арабыҙҙа кемдер агроном, икенселәр – зоотехник, өсөнсөләре ветврач йәки механик булырға теләй, ғөмүмән, яҙмышын ауыл хужалығы менән бәйләргә йыйына. Студенттар араһында әрме һурпаһын татығандар ҙа күп. Уҡырға Баймаҡ районынан ғына түгел, Башҡортостандың төрлө төбәгенән, хатта күрше өлкәләрҙән килгәндәр. Техникум майҙансығы гөрләп тора.

Яңылыҡтар

Эстафета дауам итә

1812 йылғы Ватан һуғышында еңеүгә 200 йыл тулыу һәм Рәсәй тарихы йылы айҡанлы ойошторолған “Атайсал тип янған йөрәктәр” һәм “Ағинәйҙәр” клубтары ағзалары ҡатнашлығында “Хәтерләйбеҙ, баш эйәбеҙ” эстафетаһы дауам итә. 17 сентябрҙә сәғәт 12-лә Ниғәмәт ауылының мәҙәниәт йортонда Темәс ауылы зыялылары ниғәмәттәргә  эстафета тапшырасаҡ. Программала тарихи ваҡиғаларға арналған сығыштар һәм концерт программаһы ҡаралған.

«Барыҫ»ҡа рәхим итегеҙ!

Республика, Рәсәй генә түгел, ә донъя кимәлендә еңеү яулаған «Барыҫ» көнсығыш көрәш алымдары клубы үҙ эшен дауам итә. Клубта шөғөлләнгән балалар йәйгеһен дә спорт лагерына барып, һаулығын нығытты. Ошо көндәрҙә улар 4-се мәктәптә шөғөлләнә башланы. «Барыҫ» яңы уҡыу йылында ла уҡыусылар ҡабул итә.
Белешмәләр өсөн телефон – 89608070948.

Тәүге бурыс – кешеләр именлеге

Алдан хәбәр итеүебеҙсә, кисә муниципаль район хакимиәтендә РФ Социаль страховкалау фондының Башҡортостан Республикаһы буйынса төбәк бүлексәһе дәүләт учреждениеһы идарасыһы М.М. Латыпов шәхси һорауҙар буйынса граждандарҙы ҡабул итте.

Ҡуянтауҙар һынау тотто

Кисә Ҡуянтау мәктәбендә Граждандар обороныһы айлығы сиктәрендә уҡыу күнекмәһе үтте. Иртәнге сәғәт 11-ҙә “Янғын!” сигналы бирелеү менән уҡыусылар, уҡытыусылар, мәктәп хеҙмәткәрҙәре тышҡа ашыҡты. Бының өсөн уларға 1 минут 10 секунд талап ителде. Уҡытыусыларҙың отчеты буйынса 94 уҡыусының барыһы ла теүәл килеш урамға теҙелгән.
Сигнал алыу менән ярҙамға килеп еткән Баймаҡ ҡалаһындағы 114-се янғын һүндереү часы, Сибай ҡалаһындағы эҙләү-ҡотҡарыу төбәк отряды, “Ашығыс ярҙам” хеҙмәткәрҙәре үҙ бурыстарын теүәл һәм юғары профессиональ кимәлдә үтәне. Янғын һүндереүселәр шунда уҡ ут һүндерә башлаһа, ҡотҡарыусылар иһә мәктәптең 2-се ҡатында “ут” ҡамауында ҡалған уҡыусы-муляжды ҡотҡарырға ашыҡты. Шулай итеп, берҙәм көс менән мәктәптең информатика кабинетында сыҡҡан “янғын” һүндерелде.
 

Пенсия реформалары – берҙәм эшләү һөҙөмтәһе

Уҙған шаршамбыла Волга буйы федераль округындағы Рәсәй Пенсия фонды идаралығы начальнигы В.П. Бабакаев һәм Башҡортостан Республикаһы буйынса Рәсәй Пенсия фонды бүлексәһе идарасыһы Ф.Ғ. Хантимеров эш сәфәре менән беҙҙең районда булды. Уларҙы муниципаль район хакимиәте башлығы И.Х. Ситдыҡов оҙатып йөрөнө.
 

Ер эшкәртеү айлығы иғлан ителде

Ошо кесаҙна муниципаль район хакимиәтендә ауыл хужалығы предприятиелары етәкселәре ҡатнашлығында үткән кәңәшмәлә урып-йыйыу эштәре, малсылыҡ тармағын ҡышҡа әҙерләү, МТС-ҡа булған бурыстарҙы ҡаплау, ужым арышы сәсеү, ер эшкәртеү, көҙгө йәрминкәләр ойоштороу мәсьәләләре көн үҙәгенә сығарылды. Уны район башлығы урынбаҫары Р.Р. Әбүбәкиров алып барҙы.

Бер мәсьәлә лә иғтибарһыҙ ҡалманы

Ошо аҙнала уҙған Баймаҡ ҡала биләмәһе ҡала Советының дүртенсе ултырышының көн тәртибенә 12 мәсьәлә сығарылды. Төп һорауҙар ҡышҡы миҙгелгә әҙерлеккә һәм ҡаланың сауҙа предприятиеларының бөгөнгө торошона ҡағылышлы булды.

Викторинала ҡатнашығыҙ!

“Һаҡмар” гәзите редакцияһы муниципаль район хакимиәте менән берлектә 14 октябрҙә үтәсәк муниципаль кимәлдәге һайлауҙарға арнап гәзит уҡыусылар араһында викторина иғлан итә.

Күсемһеҙ милеккә хоҡуҡтарығыҙҙы беләһегеҙме?

“Рәсәй юристары ассоциацияһы” Бөтә Рәсәй йәмәғәт ойошмаһы башланғысы менән 2012 йылдың 21 сентябрендә сәғәт 9-ҙан киске алтыға тиклем Бөтә Рәсәй халыҡҡа бушлай хоҡуҡи ярҙам көнө уҙғарыла. Уның сиктәрендә күсемһеҙ милеккә һәм уның менән алыш-биреш итеүгә хоҡуҡтарҙы теркәү мәсьәләләре буйынса граждандарға Башҡортостан Республикаһы буйынса дәүләт теркәүе, кадастр һәм картография федераль хеҙмәте идаралығы (Росреестр) хеҙмәткәрҙәре консультация бирәсәк.

16 сентябрь – Урман эшсәндәре көнө

«Йәшел ҡалҡан»һаҡсылары

«Баймаҡ урмансылығы» ДУ-һы урмансылары.

16 сентябрҙә урмансылар үҙҙәренең һөнәри байрамын билдәләй. Ошо  уңайҙан файҙаланып, “Баймаҡ урмансылығы” дәүләт учреждениеһы етәксеһе Дамир Далха улы Абдуллин һәм “Баймаҡ урманы” дәүләт унитар предприятиеһы директоры Илфат Салауат улы Мырҙабулатовтан предприятиеларҙың эшмәкәрлеге менән таныштырыуҙарын һораныҡ.

Әсәйем алтын ҡаҙығым, апайҙарым таймаҫ терәгем булды

Мөхәмәтшиндар ғаиләһе.
1950 йылғы фото.

Ғүмерҙең һәр йылы үҙенә күрә үҙенсәлекле. Әммә 1941 йыл, уның 22 июне һымаҡ тарихҡа инеп ҡалырлыҡ, йән әрнеткес фажиғәле, ҡайғы-хәсрәтле көн кемдәрҙең генә иҫенә инеп сыҡмай икән? Был осорҙо үҙ иңдәрендә күтәргән һуғыш ветерандары, тыл һалдаттарының ҡаһарманлығын һис бер үлсәмдәргә лә һыйҙырып булмаҫ ине.

Яңылыҡтар

     “Хәүефһеҙ объект”

     Баймаҡ эске эштәр бүлеге 10 сентябрҙән 17 сентябргә тиклем “Хәүефһеҙ объект”  операцияһын үткәрә. Уның маҡсаты—граждандарҙың шәхси милкен һаҡлау, уны һаҡ аҫтына алыуҙы ойоштороу. Белешмәләр өсөн телефон – 3-19-12, 2-16-54, 3-10-50.
     Өмә үтәсәк
     15 сентябрҙә 10.00 сәғәттә христиан зыяратында өмә үткәрелә. Һорауҙар менән 8 960 783 7737 телефонына мөрәжәғәт итергә.  

     Айлыҡ бара

     “Шәфҡәтлелек айлығы” сиктәрендә район-ҡалала ололарға ярҙам итеү ойошторола. Район ветерандар советы иһә өлкәндәрҙе юбилейҙары менән тәбрик итә, уларға ниндәй ярҙам кәрәклеге тураһында белешеп, тейешле сара күрә. Ойошма рәйесе Т.Ш. Бикҡолов әйтеүенсә, ошо көндәрҙә улар Ниғәмәттә йәшәгән абруйлы ағинәй Х.М. Һөйөндөкованы 95 йәше менән ҡотлаясаҡ. 

     Гөрләп йәшәйҙәр

     Темәс мәктәбе уҡыусылары ололарға ярҙам итеү эштәрен әүҙем башҡара. Улар өлкәндәргә йорт-ҡураһын йыйыштырырға, утын өйөргә һ.б. эштәрҙә ҙур ярҙам күрһәтә. Шулай уҡ мәктәптә “Хәүефһеҙ юл” тигән профилактик сара ла иғлан ителгән. Уның барышында уҡыусылар юл ҡағиҙәләре менән таныша. Уҡытыусылар балаларҙан ошо темаға арналған  кроссвордтар, һүрәттәр, плакаттарҙы ҡабул итә. Шулай уҡ башланғыс класс уҡыусылары өсөн “Ҡыҙыл, һары, йәшел” тип аталған саралар планы ла ҡаралған. Улар кескәйҙәргә юл хәрәкәте ҡағиҙәләрен өйрәтеүгә арналған.

     Башҡорт китабы аҙналығы

     Район китапханаһында 17 сентябрҙән 23 сентябргә тиклем башҡорт китаптары аҙналығы үтәсәк. Сара барышында билдәле яҙыусылар Әхмәр Үтәбай менән Рәмил Йәнбәктең килеүе көтөлә. Р. Йәнбәктең ижады буйынса шиғыр һөйләүселәр ярышы үтәсәк. Шулай уҡ аҙналыҡ барышында Салауат Мөхәмәтшиндың “Данлы, ырыҫлы төйәгем” китабының презентацияһы уҙғарыласаҡ. Бынан тыш “Йәнгүҙәй”, “Игебай мәктәбе”ндә шөғөлләнеүселәр менән осрашыуҙар көтөлә.

ЯҢЫ ЙОРТТАР ШАТЛЫҠҠА СОРНАЛҺЫН !

Сөмбөл Әминева өсөн тантаналы мәл.

   
     Билдәле булыуынса, республикала “Ауылдарҙы социаль үҫтереү” Федераль программаһы уңышлы эшләй. Беҙҙең район да 2005 йылдан был программала ҡатнашып килә. Уға ярашлы, 127 ғаилә үҙенең йәшәү шарттарын яҡшыртты.

Автобус маршруты үҙгәрә

   “Малыш” микрорайонында төҙөлгән яңы балалар баҡсаһына Белов – Азанов урамдары буйлап һыу үткәргестәр һалыу сәбәпле, 13 сентябрҙән ер ҡаҙыу эштәре тамамланғансы, 5-се маршрут автобусы Хоҙайбирҙин урамынан (һыу алыу ҡоролмаларына килеп сыҡҡан ергә тиклем) һәм артабан Шайморатов урамы буйынса йөрөйәсәк. Хәрәкәт итеү графигы элеккесә ҡала.
 

     Маршруттың киренән үҙгәреше хаҡында халыҡҡа алдан хәбәр ителәсәк.

Мерәҫтәр – беренсе!

    
     Таңсулпан Миңләхмәт ҡыҙы Хафизова Мерәҫ ауыл биләмәһен 14 майҙан етәкләй. Ошо ҡыҫҡа ваҡыт эсендә ул зыяратты кәртәләү, ваҡ мал кардаһын ремонтлау, паркты рәшәткә менән уратып алып, уны буяу эштәрен ойоштора. Ауыл тағы ла йәмләнә һәм матурая бара. Шулай уҡ Таңсулпан Миңләхмәт ҡыҙы өмәләр үткәреп, ауылды төҙөкләндереүгә ҙур иғтибар бүлә. “Әлбиттә, башҡараһы эштәр бик күп әле. Шулай ҙа ауылыбыҙ матур, таҙа булһын өсөн көсөбөҙҙө йәлләмәйәсәкбеҙ”, – ти Т.М. Хафизова.

Ауыл биләмәһе башлыҡтары осрашты

    
     Ауыл тормошо... Тырышып-тырмашып донъя көткән, мал үрсеткән, балалар тәрбиәләгән, уңғандар һәм эшһөйәрҙәр иле.